السلام عليكم
وشلونكم طيبين
ابقولكم سالفتي انا و شخاط من طقطق للسلام عليكم بس قبل ما ابدا لازم اعلمكم وراه سميناه شخاط .. سبب العيارة لانه تسذوب نمره و استماره التسذبه ما تعوق معه و يتفنن بالتسذب عاد هو تخصصه عيار ثقيل يعني ما يلعب على خفيف
قبل فتره كنت ناوي امشي من الديرة للرياض عندي شغل .. المهم موتري جلنت هنقلين موديل 82 بس اللي يشوفه يقول طيارة موب موتر .. جنوط و ستكرات و ساحبن السست و مركبن له شراع و مجعدن المراتب يعني كشخه .. هالموتر الله يخسه تقول سمكة اذا طلعتة من الماء ماتت و هالموتر اذا طلع من الديرة قام يناتع و يقطع و اذا ديورت وجهي للديره انطلقت ... و الله و اللي انا اتوهق لازم اصير بالرياض السبت الصبح قمت انشد من يبي يروح من يبي يروح ما لقيت احد قلت شكلنا توهقنا ..
طلعت من صلاة الجمعه الا بوه كم موتر بهن ارزاق يحرجون عليهن اللي معه تمر و اللي معه خضره و اللي معه قماش و زبيريات .. المهم و انا اقرب منهم الا واحد من هالمواتر فوقه شخاط و يحرج .. الرجال يبيع قماش قماش و زبيريات و الحقير يقول للزباين انه القماش جايبه من المانيا من شركة مرسيدس و انه عليه ضمان 20 سنه بالصيف يصير خفيف و يهفهف و بالشتاء يصير ثقيل و يمكن يصير بالطو مع الثوب .. الزبيريات يقول جايبهن من برجستون و يقول عليهن ضمان 17 سنه و ضد الخدش و القطع لو تجيب منشار ما يقطعهن .. و تشوفون خشش العالم زي تسذا منهبلين .. المشكله انه بوه ناس صدقوه .. و الله و انا اللي اسلم عليه .. علوم اخبار قال ابد على ما يسرك و من هنا كلمه و من هنا كلمه قال انا ماشي للرياض العصر .. قلت لوه وش عندك .. قال دق علي ضابط بالجيش اجي اشيك على مكينة F16 يقول ان البنص حق البنزين يعلق و ابزينه لهم .. قلت له و غير هالسالفه .. قال هذي سالفتي ماهنا غيره .. قلت لوه وش علي منك ابخاويك للرياض مرن قبل ما تمشي قال خلاص
رحت للبيت تغديت و قلت لامي تزهب لنا ترمس قهوه و ترمس شاهي قالت ابشر يا ويليدي و ان حصلك تجيب لنا معك من الرياض عنزروت و مرّه و حلتيته لا تقصر و اللي تقوى عليه جبوه و انا امك .. قلت له يمه كل ذولي تلقينهن عندك ابو علي حق العطاره .. قالت ادري بس يقولون حق الرياض اصلي .. قلت ابشري ... قيلت هالظهريه يوم اذن العصر و انا اقوم اصلي و اتحرا الرجال .. قرب يأذن المغرب و الرجال ما دق و امي كل شوي تقول وراك ما مشيت للحين يا وليدي .. و انا ارفع السماعه على شخاط قلت لوه وينك ..؟؟ قال بالبيت .. قلت لوه متى نبي نمشي ..؟ قال وين نروح ..؟ قلت له للرياض .. قال من يقول اني ابروح للرياض ..!! قلت له انت قلت لي عقب صلاة الجمعه تقول تبي تروح علشان الطياره ... قال اييييييييييييه نسيت يالله الحين امرك لازم الحق على الرحله لا ينكسلها طويل العمر لاني ما رحت معه .. قلت له ايه بسرعه
عشر دقايق الا الرجال عند الباب و انا اركب معوه و نمسك الطريق .. تقهوينا و سولفنا شوي ما تخلي سوالفه من الصواريخ و الارانب بس على خفيف .. عاد هو محترف بالتسذب الله يدفع البلا
شوي شغلنا الراديو الا يقولون قصة كولمبوس يوم يكتشف امريكا .. قال شخاط يا ملفوع قلت هاه .. قال تدري انه انا اللي مكتشفن امريكا بس ما بغيت اخرب على كولومبس .. قلت هاه قال هالهاه .. قلت لوه وشلون .. قال انا اعلمك وشلون
هذا يا طويل العمر كنت رايحن لم بريطانيا ادرس لغه و سكنت عند عائله علشان اتعلم تعرف لازم الواحد يصير معه لغه .. قلت له اسلم كمل .. قال يوم قعدت كم شهر و صرت ارطن لغة سمعت انه بوه رحله تبي تمشي بالبحر و انا اركب معهم و الله و نمشي بالبحر شهور بس لنا فرفره و انا تقفل معي انا و اللي معي بالسفينه قلنا وين يبي يودينا ذا قالو ما ندري وينهوله قلت انا ابروح اتفاهم معه و انا اروح لمه و اطق باب غرفته الا هذا كولمبوس يصيح .. انا : يصيح يصيح .. قال ايه يصيح و يشاهق بعد .. يقول و انا اساله وراه تصيح قال هالسفينه زاهبه و كل ابو شي بس مدري وين الله حاطن .. قلت له يا زلابه وين تبي تروح انت ..؟؟ قال رسنا على اي بر مدري وين حنا الحين و شكلنا توهقنا .. قلت له ماعليك تعال معي و ازهله .. قلت انا يا شخاط صادز انت الحين .. قال انثبر خلن اكمل لك السالفه علشان تقتنع قلت له ابشر
يقول و انا اخذ كولمبوس لسطح السفينه و قلت له وقف بجنبي انا ابمسك الطاره ( يعني القياده ) و انا امسك الطاره و انا احوفه منا و منا الا هذيك سفينه اشوف الاسطبات حقاته و مشغلن الفلشر .. و انا ادعس لمهم يوم وصلت عندهم و انا اسفط بجنبهم الا ذا جاك سبارو على خشبه واقف ... قلت لوه انا جاك سبارو اللي بفلم قراصنة الكاريبي .. قال ايه هو ما غيره .. قلت اسلم اسلم ... يقول و انا اقوله بالخير يا ولد قال هلا هلا ارحب ودي اقولك اقلط بس ما اقدر شوي الا جا واحد معوة قرد على كتفه اسموه بربوسا .. قال يالله حيهم اقلطو قلت تسلم عجلين بس ابي انشدكم ما شفتو يابس حولكم اي شي حنا لنا شهرين و حنا نفرفر بهالمياهه ما ندري من وين هي هابه و لا ندري وين حنا بوه ... قال بربوسا سهله ابوصف لك بس انتبه لا تضيع قلت ما عليك دلولا .. قال الحين تدوير منا تحط الشمس بمقفاك و تدز الين ما تصير الشمس على اذنك اليمنى قلت له اسلم قال اذا صارت على اذنك اليمنى لف يمين تصير بوجهك قلت ايه قال تدز الين ما تجيك محطه على يديك اليمين اذا وصلت لمه حطه على يدك اليسار و دز قلت لوه اسلم قال تمشي الين ما يجيك كوفي على يديك اليسار اسمه دكتور كيف و ترا قهوتهم زينه قلت اسلم يابن الحلال .. الا يوم سحب السكتون علي و قال لا تنفخ .. قلت له ما انفخ بس مستعجلين .. قال اذا وصلت دكتور كيف وصلت لليابس قلت له الله يعطيك العافيه .. و الله و حنا نديور بالسفينه و ندز على وصف الرجال و ماشين على وصفه شوي و حنا نبنشر .. انا : بنشرتو .. قال ايه بنشرنا .. قلت لكولمبس شف لك صرفه مع البنشر اخلص علينا قالي ابشر و راح زبطه هو و كم واحد من العيال و حنا ندز .. ثلاث ايام الا حنا طابين امريكا الا هم يتحروننا و مسوين عشا و مفاطيح و كل ابو شي
قلت لوه خلصت السالفه .. قال ايه .. قلت زين ما خربت على الرجال يمكن يصيح مره ثانيه او تجيه جلطه .. قال يابن الحلال ندور الاجر
شوي الا برنامج بالرادو يتكلم عن اخر اصدارات الافلام الاجنبيه .. قال ملفوع .. قلت هاه
قال تدري فلم العراب المفروض انا البطل بس يوم سمعت ان الباتشينو تووه صغير و وده يصير البطل قلت و الله ما ياخذه الا هو .. قلت يا شخاط شوي شوي علي .. قال اسأل الباتشينو و يعلمك بعدين تعال .. انا : هاه .. قال شفت مارادونا .. انا : مارادونا ما غيره .. قال ايه ما غيره .. قلت وش بوه .. قال انا وصلتوه هالمواصيل بعد الله .. يابن الحلال تلايص خلاص يكفي عاد ... قال اسمع السالفه و احكم ... قلت طيب
يوم مارادونا يلعب بكندا .. على طول انا قلت ما لعب بكندا ... قال الا بداية مارادونا بكندا .. قلت طيب اسلم ... الرجال كان يلعب هريبه معنا ( يعني مليحق ) و ندرس مع بعض بالثانويه قبل ما نتخرج جو لمنا حقين نادي ضمك بكندا .. قلت انا ضمك اللي عندنا .. قال لا يابن الحلال بكندا عندهم ضمك بعد قلت اسلم اسلم ... و الله و ياخذونن انا وياه معهم لم النادي قالو نبي نوقع مع واحد منكم عقد ما نقوى نوقع معكم كلكم .. التفت علي مارادونا و بوه الصيحه على طول دريت انه وده يلعب معهم .. قلت للمدرب خلاص وقعو معه انا مابي الا يوم خمن مارادونا و استانس قلت لوه بشرط انا اصير مدير اعمالك و اضبطك قال تم
المهم و يلعب كم سنه و يدق علي فرقسون .. قلت انا من هو فرقسون . قال مدرب ليفربول ابو علك .. قلت ذا مدرب مانشستر قال لا مدرب ليفربول تعلمن بعد من كان يدرب وقتها ..؟؟ قلت اسلم اسلم ... يقول دق علي قال ابي مارادونا معنا قلت له ميخالف بس لنا شروط قال وشن قلت يلعب مع المنتخب قال تم .. قلت ما يلعب حافي قال تم .. قلت و تعطونه رقم 10 مثل الكابتن ماجد قال تم .. قلت و تفكون لوه جيب 2010 وكالة قال تم .. قلت انا جيب 2010 ... قال ايه تحسبن سهل .. قلت كمل كمل .. قلت لوه تشرون لوه فله بالعليا يسكن به هو و عياله قال تم .. يقول وافق على شروطنا و رحنا لم فرنسا نلعب معهم .. قلت انا ليفربول بانجلترا موب فرنسا قال من اول كانو بفرنسا قبل ما ينقلون هناك .. قلت كمل .. يقول و يلعب معهم سنتين و اموره طيبه الين ما جا كاس العالم و انا امسك مارادونا على جنب قلت لوه اسمع هذي فرصتنا ابيك تسوي كل شي علشان تفوز بالكاس قال اخاف .. قلت لوه لا تخاف و اذا خفت ناظر لم المنصه تلقان فوق معي عجرا لو صار شي و لاش قال خلاص يوم جا دور الاربعه قالي مارادونا ابلعب ضد خوياي ما اقدر افوز اخاف اذا رجعنا يتوطونن و يلعنونن قلت له ماعليك انا ازبط الوضع و انا انزل لم السوق و انا اشري باروكه و البسه و البس لبس الرجال و اطب مكانه ... قلت انا مكان من هو و وين تطب .. قال طبيت مكان مارادونا بالمنتخب لعبت بداله بدون ماحد يدري .. قلت انا يعني انت اللي سجلت الهدف اللي باليد .. قال ايه .. قلت كمل يا راعاك الله ... يوم اخذنا الكاس و رجعنا الا يوم دق جوالي و ارد الا هذا ليبي ... قلت انا ليبي ليبي ماغيره اللي درب ايطاليا 2006 ... قال ايه هو ماغيره .. قلت وش يبي .. قالي نبي مارادونا معنا بايسي ميلان .. قلت يابن الحلال وش جاب ليبي لم ايسي ميلان قالي وش عرفك انت انا ابخص .. قلت كمل كمل .. قلت عندنا شروط قال وشن الشروط .. قلت انتم تشرون لوه ملابس الرياضه و الكنادر موب على حسابنا قال تم ... قلت نبي رقم 10 حق الكابتن ماجد قال تم ... قلت نبيه يدخل معكم بالاستراحه حقت الفريق ماله داعي يروح يشيش بالمقهى لحاله قال تم ... قلت بالتمارين ما يصير حارس ابد قال تم .. قلت خلاص اجل تم انتقل لمهم ... عقب كم سنه طاح بالمقناص و المكشات علشان تسذا سحبت عليه و خليته
قلت انا خلصت السالفه .... قال ايه .. قلت خلاص قربنا للديره لا تسولف .. شوي الا حنا داخلين للديره يوم وقف عند بيتنا .. قلت لوه سولف تسني اشوفك ودك تقول شي قال ابد بس ترى انا اللي بنيت لكم بيتكم ... قلت بيتنا ذا قال ايه بيتكم ذا .. قلت و انا اقول وراه يخرخر ماء اذا امطرت تعال باتسر زينوه و انا انزل و هو يدز
صح انه ونيس و راعي سوالف هالشخاط بس معوه دكتوراه بالتسذب و يتفنن بعد
انتهى
موضوع: شخاط التسذوب .. !! 
الأحد مايو 01, 2011 12:17 am
مشكوووور 
